|
雷頌德（Mark），香港著名音樂人，入行廿多年創作了逾千首耳熟能詳的流行曲，不少歌手憑藉他的作品唱出了高峰的事業；其生輝妙筆更闖進了畫家的行列。早前，他在尖沙咀舉行了首個藝術及設計展，展出了十多幅油畫、陀飛輪手表、電單車、室內設計項目及男士時裝等。雷頌德直言，做畫家是第二個夢想，而能令他重拾畫筆的，是患有亞氏保加症的長子Jack（雷鳴），「因為佢唔鍾意講嘢，鍾意畫畫，我就透過畫畫同佢溝通；而每一幅畫，我都會寫上一啲價值觀，我希望我兩個仔都係一個擁有正確價值觀嘅好人！」
溝通橋梁
走進雷頌德位於尖沙咀K11 Art Space的藝術展，和諧的色調、繽紛的油畫、發自內心的自述，都有一種窩心的感覺，看着他的十二幅人像油畫，不僅窺探到他的家庭主要成員，亦看到他為兒子付出的一切。
07年，雷頌德跟拍拖三年的模特兒女友梁家玉（Jade）結婚，長子Jack於同年8月出世，幼子Jazz（雷響）則於10年10月出世；Jack於五歲時被診斷出患有亞氏保加症，即高功能自閉症，不擅表達、不愛說話，卻有無窮的創意、豐富的想像力，愛畫連環圖構思故事。於是，觸發起雷頌德重拾畫筆的決心，決意透過畫作跟兒子溝通，「好似第一幅畫，我係畫阿Jack，頭圓圓、眼大大、大細耳。我冇畫佢個嘴，因為佢好少同人溝通，側邊再寫上一啲價值觀，『Be Your Own You』做你自己，希望佢唔好為別人改變自己，要活得真實。」
然後，雷頌德便逐步創作出其餘十一幅人像油畫，包括十六歲繼子Sean、太太 Jade、幼子Jazz、家中兩隻貓「西瓜」和「花生」，甚至寓所附近的觀音像，也成為了雷頌德教導兩子的教材，「觀音像代表『仁慈』，希望兩個仔學識去愛人，寬恕傷害過佢嘅人。」
回想最初得悉長子Jack患病，剛強冷靜如雷頌德，也難免情緒低落，遍訪名醫找尋治療方法，卻不得要領，到書局買了數本外國書籍也無補於事。雷頌德唯有放下擔憂，「我見個仔雖然唔鍾意講嘢，但佢喺學校好受歡迎㗎喎。有好多同學仔鍾意黐住佢，但佢唔同人講嘢嘅，甚至佢生日會要求話請邊個同學嚟，嚟到佢都唔同人玩㗎，好搞笑㗎！到最尾，我覺得最緊要有耐性囉，你『喂』佢十聲唔應你，你咪『喂』佢十一聲、十二聲囉，最重要令個仔變成一個開心嘅小朋友！」
投其所好
雷頌德不僅愛錫自己的兒子，當上父親後更懂得關心、幫助社會上有需要的人，與許志安、蘇永康、王傲山創立「傲翔慈善基金」，藝術展特別設計了15年的座枱月曆及T-shirt作義賣，所得收益不扣除成本全數捐贈給基金內的「開心買新書計畫」，幫助貧苦家庭為子女添置課本。
雷頌德教育兒子的方法，便是要投其所好，讓他們去做喜歡的事，不逼迫、不強人所難、不賦予壓力，他舉例說：「大仔Jack讀緊小學，之前我就係太想佢入一間好嘅學校，出咗好多力，付出咗好多，換來嘅係被學校侮辱，好唔開心，令我憎咗間學校！我覺得家嘅家長真係太辛苦太大壓力，有時會將呢啲壓力加諸喺小朋友身上，對雙方都唔好。跟住我再諗，其實到佢讀中學，我都一定畀佢去外國讀書，畀佢睇吓呢個世界，而且自己以前喺寄宿學校真係學咗好多嘢，當係咁嘅時候，佢喺香港讀邊間學校又有乜所謂吖？應該畀佢舒舒服服、開開心心咁返學吖嘛。」
雷頌德強調，一個人的命運是由自己來決定，不是父母所能操控的，人生的時間有限，應該讓孩子自由選擇自己喜歡的事去做，「我係過來人，我自己都係咁；我鍾意玩音樂，你唔可以唔畀我玩音樂，每一樣嘢都係『天生我材必有用』，總之唔好嘥時間啦！」
談及跟兩子相處之間的難忘事，雷頌德坦言每一刻都感動難忘，他慶幸兩個兒子都愛錫他，卻又為工作繁忙，導致減少了父子共聚的時間而感到遺憾，「有時多嘢做，可能幾日都唔見到兩個仔，一見番，會發覺兩個仔都大個咗喎，原來佢哋可以長大得咁快！佢哋的確令我好窩心嘅，我點努力為咗佢哋，都係好值得！」雷頌德溫婉的說。
本文摘自2014年10月29日《東周刊》親子天地
|
|
|
|
