|
早前，叮噹（現譯：多啦A夢）配音員林保全去世，叮噹的經典聲音從此消失了；但在其女兒林芷筠的心目中，爸爸是一位活生生的「真人版叮噹」。從他對工作的熱誠、平和的性格、豁達的做人態度，以至在女兒的日常生活、物質和心靈上都提供豐足的支援，可謂有求必應。在管教上，這位「叮噹爸爸」從來沒有打罵過女兒，只是從旁引導她去經歷和體驗，有一位如此和藹可親的爸爸，難怪芷筠都覺得自己非常幸運！
引薦入行
資深配音員林保全的女兒林芷筠（Safina），身形嬌小，性格爽朗率真，克紹箕裘，投身配音界工作，更達十二年之久。父親配叮噹，而芷筠則配卡通片《喜羊羊與灰太狼》，以及今年的賀歲動畫《喜羊羊與灰太狼之羊年喜羊羊》中的懶羊羊角色，將這隻頑皮羊演繹得出神入化，展現「寸嘴」和蠱惑的個性；而且她更在青衣城作「我的小小配音員工作坊」的導師，教小朋友配音的技巧。
當過童星的芷筠，遺傳了爸爸的配音天分，她坦言自小不喜歡讀書，中五畢業後，曾做過售貨員和學美容，後來經爸爸穿針引綫而入行。「我細細個跟爸爸去錄音室，自己覺得喺呢方面有啲天分。後來做過幕前，但覺得自己唔適合，嗰時讀書又唔好，爸爸就帶我去佢朋友開嘅公司睇吓人配音，當學多樣嘢；跟咗一個月左右，有次老闆話爭個女人嘅聲，畀我試吓，之後就開始咗配音工作。」
芷筠在03年入行，09年正式加入無綫的配音組，與爸爸做同事，一齊返工、放工，日夕相見，關係親密。「佢好支持我做配音，而且同爸爸做同事有更多機會見面，以前佢車完媽媽返工，就車埋我一齊返工；媽媽冇做教師，退休後，就由我車爸爸返工，做個孝順女嘛。」
配牀上戲
典的一次可算是在外國電視劇《靚太唔易做》，「嗰幕講我做爸爸嘅第三者，做情婦唔緊要，但要配上牀嘅反應聲，仲要有對白，我對片時先知，嗰時我望吓爸爸，但佢冇理我，繼續對，好專業；而我就有啲尷尬，面都紅晒咁配。」父親在配音界舉足輕重，有否傳授女兒一招半式？她坦言：「爸爸只係畀我五字真言『你睇多啲啦』，於是我會多啲留意爸爸同其他人點配音。原來，同一句說話，邊個字咬實啲就會有唔同效果。」
其實，在芷筠心目中，爸爸的犀利之處並非在配音方面的成就，而是她真切感受到爸爸是一個「真人版的叮噹」，並且是非常超班的。「當佢去世之後，我諗番佢嘅過去，覺得佢好叻、好犀利、性格好好，就算有脾氣都好溫和，樂天又正面，EQ又高。」芷筠猶記起爸爸非常疼愛自己，由細到大從來都沒有打罵過她，喜怒不形於色，「我記得有次唔想做功課，發脾氣掟間尺，但爸爸都冇話我，谷住啲眼淚，面紅晒咁；所以就算我做錯嘢，佢都唔會話我錯，亦唔會話我知應該點做，只會慢慢引導我去搵答案，等我自己去經歷同體驗。」
期望可達到
叮噹事事幫助大雄，而這位「真人版叮噹」對女兒亦如出一轍，有求必應。當年，林保全更不惜大解慳囊，買了一個四千大元的名牌袋給女兒，這點令芷筠記憶猶新。「嗰時讀緊中一，人人都用『Bold袋』，我同爸爸講都想買個。最初佢就嫌四千蚊太貴唔買，但原來佢一路將事件記掛喺心；有次同佢行街，見到個袋，佢二話不說就買咗送畀我。」後來，喜歡音樂的芷筠想擁有一部電子琴用以作曲，父親又再慷慨地贈送給她。此外，芷筠從來都不需要上繳「家用」；反之，父親更試過幫她解決金錢上的問題。物質以外，林保全亦投放很多時間和心機，讓女兒心靈富足。「嗰時逢星期日一定係我哋嘅親子日，一家三口齊齊出街；暑假就一家人去旅行，所以我覺得好難得，有個咁好、咁有成就嘅爸爸，畀到咁好嘅成長環境我。」
芷筠更在爸爸身上學到不少做人道理、人生觀和敬業樂業的精神。「我覺得佢去到好高境界，就算佢聽到其他人對佢嘅負面批評，佢都可以當聽唔到，繼續做好本分；佢好投入工作，試過連續配十個鐘，中間冇飲水、冇休息都係咁配。」雖然，「叮噹爸爸」走了，但堅強的芷筠一樣撐得起，繼續努力工作，「我人生最成功係有咁好嘅父母，同搵到個好老公支持我；工作上希望我可以做好啲，唔好影響爸爸嗰名。」
本文摘自2015年2月11日《東周刊》親子天地
|
|
|
|
