|
身為父母，看着兒女成長的一點一滴，都會充滿欣喜之情，就算是日理萬機、「征戰無數」的父親，回到家中都會頓然變成慈父，為兒女任勞任怨。在桌球壇上「響噹噹」的職業桌球手傅家俊（Marco），經常打出「一桿過百」的佳績，育有一名兩歲大女兒傅晞媛。起初，他落手落腳學湊女，只想感受一下為人父親的苦與樂；如今，女兒逐漸長大，天真活潑，喜歡看書和聽故事，所以傅家俊在家中放下Cue棍，樂於搖身變為一位故事爸爸，為女兒講故事。有時女兒不經意地講出一、兩個生字，已帶給他無限驚喜，比贏冠軍更興奮。
英國出世
在香港桌球壇有「神奇小子」稱號的傅家俊，是一位職業英式桌球手，十二歲隨家人移民溫哥華，96年回流香港，發展其桌球事業，更多次在公開比賽中獲勝，現時世界排名第八，成就非凡，更四次當選「香港傑出運動員」的殊榮。11年他與拍拖兩年多的女友結婚，現育有一名兩歲大女兒傅晞媛（包包）。雖然傅家俊已回流香港，但由於經常要參加英國的賽事，所以英國可算是第二個家，就連女兒都是在當地出世，「記得嗰時我剛剛喺英國比完賽，同太太做完冬，第二日入醫院開刀生，之後外母先飛來英國照顧太太。」
這位新手爸爸打桌球當然易如反掌，但對於湊女，他卻要由頭學起，落手落腳，體驗初為人父的喜悅。「我太太係開刀生，加上餵母乳，好多嘢都唔方便，所以我都會幫輕吓佢。最初乜都唔識，由換片、 佢瞓覺，以至連點樣抱佢都要由頭學起，可能始終係爸爸，冇媽媽嗰種天性，所以我每日都要比太太更加努力去學。」有女萬事足的傅家俊，笑言之前湊女雖然辛苦，但他非常珍視這段寶貴的階段，樂在其中。「湊BB雖然辛苦，但都好玩。呢個階段係好寶貴，跟住佢就會大得好快，所以好珍惜呢段時光。」
莫大驚喜
在不用比賽的日子，便是傅家俊與女兒的親子時間，他喜歡帶女兒周圍逛，與一般父母無異。「佢好鍾意出街，又鍾意動物，所以有時會帶佢去公園、行吓商場咁；不過香港嘅天氣好熱，有時想同佢去海洋公園，搭吓叮叮同小輪都唔得；佢辛苦時，我哋大人亦辛苦。如果我哋喺英國嗰邊會帶佢去公園多，因為我哋住倫敦嗰邊，夏天天氣好，啲公園又靚。」現時兩歲的小人兒喜歡說話之餘，還喜歡看書，所以傅家俊與太太經常講故事給她聽，帶她去圖書館看書，培養她的閱讀興趣，有時女兒會突然吐出一些詞彙，對傅家俊而言，已是一種莫大的驚喜。「佢好鍾意睇書同聽我哋講故事，所以佢幾個月開始我哋就已經同佢講故事，當中有中文和英文故事，都係睇住啲圖畫同佢講。雖然有啲字好深，佢可能唔明，但等佢慢慢吸收，佢有時會突然講一、兩個生字出嚟，先知道原來佢係記得啲字。」
喜歡玩波
傅家俊的女兒動靜皆宜，喜歡看書之外，對不同球類都感興趣，尤其五顏六色的桌球更深得她的歡心。至於會否教導女兒成為接班人？傅家俊坦言一切以女兒的興趣作依歸，「有時會帶埋佢去練波，佢好鍾意五顏六色嘅波，我有時會教吓佢打，抱佢揸住枝Cue再喺佢後面幫佢出Cue，佢見到入波會好開心，如果將來佢對桌球有興趣我一定會教佢。」
不過，現階段女兒對其他球類似乎更感興趣，「佢好鍾意喺電視睇人哋打網球、踢足球，我有買個波仔同一套高爾夫球玩具畀佢玩，佢仲會玩得好開心添。」
至於女兒將來的學業計畫，傅家俊與太太暫時沒有一個很長遠的藍圖，但打算安排女兒在香港讀書。「我哋打算畀佢喺香港讀幼稚園，想佢學中文，將來如果佢想，都會畀佢去英國讀書。」傅家俊坦言不希望將來自己變成「怪獸家長」，只希望一切以女兒的開心為首。「其實，好多家長都知道有呢個問題，我覺得成個氣候同學校文化有關。我唔希望自己會係咁，讀書固然係重要，但我希望個女有一個開心嘅童年，唔想畀壓力佢，最緊要係讀得開心。」傅家俊暫時還未受到「怪獸」大氣候所感染，現階段只享受抱抱女兒，與她在一起，已足以令這位桌球上的「神奇小子」放下Cue棍，樂透半天。
文摘自2014年12月31日《東周刊》親子天地
|
|
|
|
