|
「問題天天都多，beli bala beli bala⋯⋯」，相信大家對這首卡通片《櫻桃小丸子》的主題曲《問題天天都多》都耳熟能詳；眨眼間，當年主唱這首兒歌的歐倩怡，已為人母，育有一子一女。
好學不倦的歐倩怡，除了當全職主婦之外，還不斷進修增值自己，修畢營養學高級文憑課程，市場管理學學位課程後，原本想更上一層樓；但由於兒子剛升上小一，所以她為了兒子甘願暫時放棄修讀碩士課程的念頭。媽媽無時無刻的自我犧牲，換來一家四口關係融洽且親密，彼此真情對話，關係猶如卡通片小丸子一家人的寫照。
全職主婦
當年，憑主唱兒歌《問題天天都多》一炮而紅的歐倩怡，因拍攝旅遊特輯而邂逅郭晉安。兩人於06年結婚，現時育有一子一女，長子郭令山六歲，就讀保良局蔡繼有學校一年級，三歲半的幼女郭以雅，就讀九龍塘靈糧堂幼稚園。
作為全職主婦的歐倩怡，閒時寫專欄，除客串過一部電影之外，幾乎絕迹演藝圈，將全副心機放在一對寶貝仔女身上，每日管接管送，成為子女的御用司機；她還當長子學校的家長義工，笑言每日好似打仗般，可謂忙上加忙。「我夜晚湊咗佢哋瞓覺之後，仲要焗埋第二朝麵包，然後先做自己嘢，搞到點幾先瞓。第二朝六點起身，送佢哋返學，所以連買餸都冇時間買，每日寫定啲材料畀工人姐姐去買。每兩個星期左右，就會喺阿仔間小學嘅Cafe度做Cashier，都幾好玩。」
雖然已為人母，但歐倩怡仍孜孜不倦，不斷增值自己。生育之前，她已完成一個營養學高級文憑課程，之後花了四年時間完成市場管理學學位課程，跟着再讀了兩個航空課程，今年年初再考獲船牌，興趣多多。不過，由於長子剛升讀一年級，本來想繼續修讀市場學碩士課程的大計，亦要暫且擱置。「當年我會考未放榜就參加新秀入行，會考得五分，所以我想追番以前Miss咗嘅嘢，如果過咗呢陣火，我驚自己會放棄。但個仔今年升咗小一，唔知新環境係點，所以安仔叫我等陣先，可能下年先讀。」自言男仔頭性格的歐倩怡，壓根兒原來想當飛機師，還喜歡揸船；相反兒子情迷火車，是一名《湯瑪士小火車》迷，各有所好。
齊齊讀書
這對「飛機迷」媽媽與「火車迷」兒子，經常一起讀書，並各自看喜歡的圖書作減壓，營造良好的讀書氣氛。「本身我好鍾意睇書，當我壓力好大時，去睇吓介紹飛機嘅相集就可以減壓，然後再拎啲課本出嚟讀；我個仔都係咁，由於我哋唔畀佢睇電視，佢唯一娛樂就係睇圖書，睇完佢最心愛嘅《Thomas & Friends》圖書後，狀態OK，就可以串吓字。」
利用圖書減壓之外，活動教學是歐倩怡教仔的最佳良方，同時可促進親子關係。「早排我考船牌，要記摩斯密碼，真係好難記，於是我同個仔喺客廳，一人坐住一個咕臣，再拎住一條包書膠卷扮撐船。我教佢架船快撞到對方，要響乜嘢按，架船對頭又要響乜嘢按。當遊戲咁玩又可以順便溫習，所以我覺得活動教學好有效。」兩母子更在家中大玩科學實驗，邊學邊玩。「早排佢有份科學功課，叫我哋家長蒙住子女雙眼，再畀唔同味道嘅食物佢哋試，好似玩『獎門人』啲遊戲咁，佢好鍾意玩。」
重視語文
歐倩怡不希望讓子女在「高壓」下成長，但首要是加強他們的語文和溝通能力，「喺香港最少要有英文、中文、普通話嘅語言能力，亦係最基本嘅溝通能力，所以我自小加強佢哋呢方面，等佢哋可以有信心去表達自己，語言能力好，連帶吸收知識自然亦會好。」
踏入小學階段的兒子，開始進攻運動項目，學游泳、網球和跆拳道。至於身形較矮小，性格較活躍和Social的女兒，則喜歡跟哥哥一起跑跑跳跳，當練體能。兩兄妹生性懂事，一家人在晚上祈禱時，會為爸爸代禱，令歐倩怡大為感動，「我哋係基督徒，習慣每晚都一齊祈禱，佢哋知道爸爸有新劇開，有壓力，會為爸爸代禱，亦會講喺學校發生嘅事同心底說話，大家關係好Close。」言談間，歐倩怡收起「小丸子」的Cute聲綫，眼?流露出一片慈母之情。
本文摘自2014年12月3日《東周刊》 親子天地
|
|
|
|
