|
93年入行的張慧儀，因為一套電影《強姦3》奠定了「性感女神」的地位；還記得二十世紀的她，拖着拉丁舞王男友霍紹裘出席多個公開場合，流露着風騷甜美的笑容；可是，03年卻因遭他毆打而離開娛圈、離開香港、離開這個傷心地。去年回流，接拍T V B劇集《女人俱樂部》，張慧儀身邊多了一個十歲的養子Hanson，「佢好細個時，我就話畀佢聽佢嘅身世，我用一個令佢聽咗唔覺得受傷害嘅方式同佢講，話佢係落入凡間嘅小天使，要嚟拯救有好多壞習慣嘅我。」昔日愛蒲買醉的嬌娃，現在成了賢淑良母，「我每朝六點幾就起身，每晚十點就瞓覺，我唔覺得領養囝囝犧牲咗啲乜，至少佢畀咗一個『家』我。」
母性
提起張慧儀，你會記得她是處境劇《真情》?面的「彩瑤」，還有03年遭未婚夫霍紹裘痛毆至爆眼、退出娛樂圈的悲情女主角。事隔十年，張慧儀於去年回流香港，接拍TVB劇集《女人俱樂部》，樣貌身材依然，昔日飽受情傷的傷疤找不到，更多了一種幸福感。
張慧儀的幸福，不是來自找到好歸宿，她口中的「真愛」是在北京做生意時，於收容有病孤兒的「平安之家」領養回來的孩子Hanson，「係緣份！有次我參加『平安之家』嘅活動，之後帶咗Hanson去食雪糕，佢突然嗌我一聲『媽咪』，我啲血即刻由腳底衝上腦，一吓就激發咗我潛藏內心嘅母性，我決定要抱佢返屋企。」澎湃的母愛，令單身多年的張慧儀，不顧一切把Hanson視作己出，「我領養囝囝冇同過任何人商量，因為根本冇人會支持我。一嚟我未結婚，二嚟我又唔係有錢到唔使做，三嚟佢有先天性心臟病！我媽咪有次打電話嚟搵我，聽到屋企有細路仔聲先知呢件事。」張慧儀的父母無疑會擔心及反對，但多年來看着她的改變，現在也完全接受了Hanson，「我有咗Hanson之後，作息時間健康咗，好多壞習慣都戒咗；我以前成日夜蒲劈酒，晚晚凌晨五、六點先瞓，我發覺原來我唔需要呢啲嘢。我信咗基督，家每晚九點幾十點就瞓覺，成個生活好正常，甚至我個人嘅價值觀都有轉變。」
真愛
張慧儀坦言，自離開娛圈到北京從商，至今十一年都一直沒有拍拖，期間縱有合適的對象出現，卻因對方不能接受Hanson而沒有下文，「我覺得真正嘅緣分要到嘅時候自然會到，唔需要刻意去結識；如果係真正嘅Mr.Right，佢自然會接受我囝囝，囝囝亦會接受佢。其實你諗吓，一對夫妻要行到老，話長唔長話短唔短幾廿年，如果大家嘅價值觀接近，遇到問題嘅時候就唔會咁容易離婚，可以避免好多不必要嘅糾紛！我以前嘅感情失敗，就係因為自己蒙蔽咗，追求一剎那嘅浪漫、激情。激情過後，人嘅真面目就走出嚟喇， 咪搞到一鑊粥囉！」張慧儀爽直的說。
初為人母的張慧儀，認為教育孩子絕非易事，一言一行、情緒等各方面均要做好本分，才能孕育出品格高尚的孩子，「佢好鍾意去油麻地一個朋友屋企玩，之前人哋送咗個紙燈籠畀佢，我唔畀佢攞，唔可以去親人哋屋企就收人哋嘅禮物，唔可以畀佢養成呢種壞習慣。我平時都有鬧佢，好似近排我好忙，我都係人吖，朝朝六點幾起身，做做做，做到夜晚；有時佢稍為唔聽話，我都會鬧鬼佢，鬧完咪解釋番畀佢聽。媽媽養佢唔容易，一個屋企正常有爸爸同媽媽一齊搵錢，家得番媽媽一個搵錢，又要供佢讀書，所以佢要聽話。」
值得
去年回流香港拍劇的張慧儀，決定定居於此，也為Hanson找到了一所合適的學校，「間學校係小型學校，全校收齊學生都係三十個嘅啫，校方唔只會教育學生，仲會教埋家長點樣教育小朋友。
由於Hanson患有先天性心臟病，身體狀況不能太過操勞，因此，張慧儀也絕不會加入「怪獸家長」行列，將兒子的時間表排得滿滿的，「我會畀佢搵番自己嘅興趣囉，不過，我覺得樂器係需要學，可以陶冶一個人嘅性情，所以遲吓會畀佢喺教會度試吓打鼓或者彈結他，睇佢鍾唔鍾意。」滿口湊仔經的張慧儀，付出了無限心機和時間給Hanson，卻從沒覺得自己犧牲了甚麼，「我覺得係值得嘅，佢都畀番咗一個『家』我啫，如果唔係，我就一個人喇！」
落入凡間的天使，又豈只Hanson一個？
本文摘自2014年10月22日《東周刊》親子天地
|
|
|
|
