|
跑步，可以強身健體，訓練專注力和耐力，好處多多。
不過，對於小朋友來說，要培養他們的跑步習慣，先要從興趣入手。這點正是投資專家兼長跑好手林一鳴的經驗之談。他育有兩名分別十一歲及五歲的兒子，最常的親子活動是跑山，沿途邊跑邊玩，捉昆蟲、賞植物，從而引發他們對跑步的興趣。加上，林一鳴更特意帶兒子衝出香港，齊齊參加瑞士和澳洲的馬拉松賽事，令他們有所體驗，兼輕鬆地享受跑步的樂趣。
至於在金錢管理方面，林一鳴自小為兒子設立「目標錢箱」，以及將零用錢交他們自行管理，並不會強逼兒子儲錢，讓他們在運用金錢的過程中有所反思。
興趣多多
現為中信證券國際董事的林一鳴，擁有上海交通大學博士後（Post-Doc）及中大財務系博士的銜頭；他亦是一位專欄作家，在《頭條日報》撰寫投資專欄、《華爾街日報》寫紅酒，《主場新聞》網站寫跑步，興趣多多。不說不知，原來他已有二十多年的跑步經驗，並堅持每星期跑三小時「長課」，即由銅鑼灣作起點跑至港島南區，總共約三、四十公里的路程，每星期更會跑步上班四至五次。除了參加本地馬拉松之外，更多次參加外國的馬拉松和比賽，是一名不折不扣的跑步發燒友。
家庭方面，林一鳴育有兩名兒子，分別是十一歲就讀聖若瑟小學的林卓翹，以及五歲大的林卓康。每逢周末他都會與兒子跑步及跑山，父子三人在灣仔峽道和香港仔水塘留下不少汗水。「小朋友唔可以全程係咁跑，佢哋好鍾意跑山，因為沿途有好多昆蟲睇，佢哋又鍾意捉蝌蚪、蝴蝶同草蜢，跑吓玩吓咁。」
非為獎牌
林一鳴三父子更跑出香港，參加在外地舉行的馬拉松。2011年，三父子齊齊參加瑞士阿爾卑斯山馬拉松，爸爸跑上山，兩名兒子在山下跑兩公里；2012年，三人再次出征，參加澳洲獵人谷Hunter Valley的馬拉松賽事。「佢哋好鍾意參加比賽，尤其喺外國畀小朋友參加嘅馬拉松。嗰度好似嘉年華咁，有彈牀、波波池、有玩具同爆谷，冇乜比賽氣氛，好輕鬆，所以佢哋唔會跑得好辛苦。」
不過，林一鳴強調讓兒子參加馬拉松並非為獎牌，而是增加他們的體驗，志在參與，所以他一直沒有正式「特訓」過兒子。「你逼小朋友要跑得快，佢哋一定可以跑到，但好似機械人咁唔會開心，長大後可能會變得討厭跑步。所以我寧願先培養佢哋對跑步嘅興趣，到十二、十三歲再慢慢執姿勢。」
目標錢箱
原來，林一鳴的長子五、六歲時，曾經參加過正規的跑步訓練班，以致令他對跑步有點卻步，所以令林一鳴有較深的領會。「大仔曾經參加過一年正規嘅跑步班，執吓啲正確姿勢，速度係快咗，但跑得唔開心，後來我都檢討番，所以就冇再畀佢上堂。」至今，雖然長子都會跟隨林一鳴跑步，但天分不及幼子；的而且確，在訪問當日，他的幼子不停地在運動場跑圈，邊跑邊笑，一臉自得其樂的樣子。
作為一位投資專家， 對於兒子的理財管理，林一鳴都有一番心得，自小灌輸兒子理財概念，為兒子設立「目標錢箱」。「佢哋兩、三歲開始，我用相機影低佢哋想買嘅玩具，然後貼喺一個兜度，如果嗰件玩具係十蚊，就畫十個格，每日畀一蚊入去個兜度就畫一畫，畫晒十格就買畀佢。雖然當時佢哋未有數字嘅概念，但畀到個視覺效果佢哋知道。」林一鳴還要兒子自行管理零用錢，幼子每星期有十元零用錢，長子有二十元，他不會強逼兒子儲錢，讓他們在運用金錢的過程中有所反思。
他說：「我有定期畀零用錢佢哋，並叫佢哋寫低想買嘅嘢作為目標，由佢哋自己計畫點用錢，等佢哋喺過程中學習自己處理金錢。好似大仔細個時儲到十蚊，本來佢想去買一件玩具，點知見到部扭蛋機，就轉移咗目標。雖然佢最後好後悔，但我唔會畀錢佢再買過件玩具，等佢喺生活經驗中學習。」
此外，林一鳴表示從沒有為兒子購買教育基金。「佢哋嘅教育經費我可以處理到，因為我都係做呢行，唔使畀人管理，而且中間嘅手續費同收費都好多， 所以我覺得冇呢個必要。」
本文摘自2014年3月19日《東周刊》
|
|
|
|
