|
母與子女有良好的親子關係，可以衝破重重障礙。作為親子專家的狄志遠，處理過不少家庭問題，談及親子相處之道當然駕輕就熟，更實踐在一對子女身上，難怪他們非常懂事，從不靠父蔭，獨立自主。不過，所謂「能醫不自醫」，多年前，狄志遠因工作忙碌而忽略了女兒的成長，以致父女的關係日漸疏離。他坦言，親情錯失了便難以彌補，但慶幸父女彼此仍可以友相待，不至於造成遺憾。
給子女自由
現為基督教香港信義會社會服務部總幹事，及創立香港家庭教育學院的狄志遠，與從事長者及復康服務的太太，育有一女一子。而投身社工界的長女狄上怡，今年二十八歲，年底將與任職警察的男友結婚；十八歲的幼子狄上行，是應屆中學文憑試考生，暫時未獲大學取錄，前途仍在摸索階段。
本身是社工出身的狄志遠，對於大大小小的家庭問題早已司空見慣，談及對親子關係的要訣，他當然樂於分享。「我覺得親子關係係最核心嘅問題，當親子關係好，好多問題都可以解決，但家嘅父母成日做咗好多破壞親子關係嘅事，例如對子女有好高嘅期望，同埋好早就將成人世界嘅競爭氣氛投放喺佢哋身上，所以同子女關係唔好。」作為親子專家的狄志遠，對子女的要求總是以他們的進度作原則，避免與其他人作比較，讓他們自己承擔責任，發憤圖強。而作為父母則從旁鼓勵，增加他們的自信心，更重要的是從小訓練他們的獨立和自理能力。他娓娓道出：「我哋冇請補習老師，要佢哋三年級開始自己做功課同溫書，我哋成日鼓勵佢哋，等佢哋有動力，唔會有挫敗感。而且，由細到大佢哋都好獨立，我哋亦都冇請工人，自細要佢哋自己起身、梳洗，亦唔會幫佢地執房，到家個仔都會自己執房，同班朋友喺屋企嘅天台ＢＢＱ完都會自己清理乾淨。」的確，狄志遠給予子女很大自由度，從來不會嚴厲管束，只會默默尊重和支持他們所選，無論是學業抑或工作。長女在城大修畢社會工作副學士後，前往澳洲working holiday，回港後自行找了一份深宵外展的工作；至於幼子同樣靠自己找到一份暑期工，自食其力，將來有志從事創意資訊科技的工作。狄志遠續說：「我唔會逼個仔一定要讀社工，佢有自己嘅興趣同目標，最重要係自己鍾意，我幫佢搵份工係好容易，但佢唔想我幫佢。個女第一份工係做深宵外展社工，我冇畀意見亦冇幫佢，佢哋鍾意靠自己多啲。」
與兒子親密
話雖如此，狄志遠在處理親子關係，尤其與女兒的相處曾一度「碰壁」。在九一至九五年間，狄志遠擔任立法局議員之時，公務繁忙，以致忽略正值成長黃金時期的女兒，至今彼此的關係疏離。他感慨地說：「以前一早要去立法局開會，夜晚又要同啲街坊開會，周末又要出席好多家校合作嘅活動，陪唔到佢，於是慢慢大家嘅關係開始疏離。到佢青春期嗰時，就想尋求獨立，最記得喺佢十六歲嗰年，同我哋講係最後一次陪我哋去睇聖誕燈飾，之後都冇陪過我哋去睇。」女兒一早已離家自住，每個月均會相約父母吃飯相聚。「佢有八成時間都係講自己工作點，或者對事物嘅睇法，有時有啲理性嘅嘢就會同我講，但通常佢有乜嘢事都會同太太傾，我都唔會有hard feeling嘅，咁我哋感情都ＯＫ，而且佢都大個女。」狄志遠與女兒的關係猶如朋友般，這點他早已習慣。
相對女兒，兒子與狄志遠的感情則大相逕庭，皆因兒子出世時，狄志遠已經不再擔任議員的工作，主力做社工，自然有較多時間與他相處，至今關係仍然親密。他細訴：「個仔到家有時會搭吓我膊頭、挨吓我、一齊去睇戲、行玩具店。雖然佢冇個女咁有少少反叛，但有時同佢講一、兩句就會煩厭，咁我哋都好識做立即收口。」狄志遠明白年輕人有自己的世界，深明作為父母要有所變通，彼此才能和諧相處。
本文摘自8月21日東周刊
|
|
|
|
