|
人生如戲！螢幕中的經典慈母，走到現實世界，也是慈祥和藹人見人愛的母親。
她是鮑起靜，亞視「鎮台之寶」、○九年金像獎影后，與電影監製方平育有一名三十歲的女兒。
鮑起靜的用心良苦，令女兒平步青雲，現修讀工商管理博士學位；她的關懷備至，成為了女兒的愛情顧問。看着女兒十來歲便踏上青葱愛情路，鮑起靜沒有嘮叨與反對，反而不斷的溝通與接納，造就了一段愛情長跑去到新的跑道，彷彿成了女兒光明前途的英雄：「個女下年六月結婚喇，佢細細個就過咗外國，咁大個女起碼都冇試過行差踏錯，第一個男朋友就去到結婚喇，都算生性。」鮑起靜呷着凍檸水，嘴角帶笑着說。
方家精華
鮑起靜與方平的女兒名叫方之樺，英文名Eva，乳名「之之」，意思是「方家之精華」，顧名思義，必得到萬千寵愛、照顧周到，鮑起靜卻直言丈夫方平不懂得愛錫女兒，「佢三十歲生個女，嗰陣思想都未成熟，好似唔識得應該點樣對個女，到個女識嗌『爸爸』，佢先識得錫個女。」鮑起靜還透露，當方平得悉女兒十多歲時有了男朋友，他氣憤難下、百般不順，良久才能接受事實。
「個男仔係之之同學嘅哥哥，佢有一次去同學屋企見到佢哥哥，兩個好快就一齊，嗰陣個男仔已經去咗英國讀書，所以之之讀完中學，就要求要去外國讀書。」鮑起靜說得淡淡然，不忘補充一句：「我一早知道佢哋拍拖喇，唔使問都知，之之成日神神秘秘傾電話，做阿媽嘅點會唔知？不過我冇鬧佢，又冇反對，剩係叫佢帶畀我見吓，就算係佢啲女仔同學，我都會要求見吓，我想知佢同啲咩嘢人來往嘛。」聲線與眼神跟螢幕中的慈母角色無甚分別。
體貼母親
鮑起靜與女兒情同姊妹，縱使女兒十六歲便到了英國讀書，繼而在那邊工作、生活，每遇上任何工作或感情問題，女兒總會第一時間致電母親哭訴，尋找心靈上的慰藉，「我同個女嘅感情之所以咁好，可能係因為我個人比較隨和，自小都唔會鬧個女，而係不斷同佢傾偈、講道理；當然，個女喺成長過程入面，都會有啲嘢令我激氣，好似十零歲開始追星，儲明星相，我以前會覺得好大件事，好擔心，而家睇番，呢啲算得上係咩嘢大事呢？我仲記得嗰陣我話佢兩句，個心都好酸，然後靜咗落嚟，個女突然間同我講：『媽咪，你唔使擔心，我一定會係個好媽咪嚟㗎！』即係佢知道媽咪難做，明白媽咪係點樣為個女好。」鮑起靜為了教導女兒，的確花了不少耐性和心血，譬如女兒五歲時，她為了讓她學習游泳，一家三口便到了海洋公園的水上樂園，不斷慫恿她潛水熟習水性。適逢當日是周末假期，泳池人頭湧湧，方平本來已經暴躁，再加上看見太太不斷催逼女兒下水，但又不奏效，他即時怒氣沖沖破口大罵，「突然間，個女自動自覺將個頭潛落水，方平見到即刻收晒聲，其實個女係唔想爸爸鬧媽咪，佢真係好錫我。自此之後，佢就學識咗游水。」鮑起靜柔情地低聲說。
方平哭了
年輕時的方平氣宇軒昂，與鮑起靜的弱質纖纖成強烈對比，就連她本人也承認方平會欺負她。不過，男尊女卑的夫妻模樣，在女兒到外國升學的一瞬間，卻有意想不到的反差：「嗰陣我同方平送完個女去倫敦寄宿學校，之後就搭火車走，點知方平一上到火車就喊，佢同我講：『你睇，我哋個女又矮又肥，其他同學咁高大，佢實會畀人蝦喇，好慘呀！』我咪叫佢唔好喊囉，個女一直喺我哋身邊咁舒服咁順利，要畀佢出去獨立吓，佢就算畀人蝦都冇所謂，咪喺被蝦嘅過程入面成長囉，咁先會堅強嘛。」鮑起靜瞪着眼說。這一刻的她，氣概不凡，柔弱女子為了愛女，變了英雄。
本文摘自10月30日東周刊親子天地
|
|
|
|
