|
從政逾二十年的民主黨立法會議員涂謹申，除了充滿書卷味和正義感之外，去年十月尾開始還散發出一股濃烈的慈父味道。每當抱着九個月大的兒子，他便肉緊得咬牙切齒，隨時隨地也可送上朱唇兩片，熱愛得沒辦法有一刻分離。
訪問涂謹申，縱使吃着雲吞麵，他的眼神也停留在兒子涂信之（Samuel）身上，他難掩喜悅地說：「真係要好感恩有個仔，做咗爸爸之後， 立法會啲警衛見到我，都話我開心咗好多，連個樣都好咗；好在老婆大肚嗰陣，買咗兩張木村拓哉嘅海報貼喺屋企，個仔似我就大劑，又黑又有熊貓眼。」太太阿Sue不忘補充一句：「係我要求㗎！」然後兩夫妻相視而笑。
三口子的家，幸福滿瀉。
特首教路
香港立法議會史上最年輕的當選人涂謹申，九二年結婚，婚姻維持了十五年後結束；至○八年重遇現任太太Sue，○九年再婚，去年更誕下兒子涂信之。四十八歲得子，令涂謹申快樂無比，他說：「有個仔，係好大嘅祝福啦，因為我都算係大年紀，我一路都好鍾意小朋友，全個立法會都知。我九一年入立法局吖嘛，嗰時啲同事一路都鼓勵我快啲生BB，尤其是曾蔭權，叫我玩多幾年好喇，唔好咁遲。因為佢話佢嗰時都係懶叻咁，過咗幾年二人世界，之後想生喇，點知搞咗幾年都唔掂，所以佢話唔好以為一搞就掂呀，好好笑！總之就好大恩典、好大福氣啦！」
身為家中獨生子的涂謹申，現在有仔萬事足，到立法會、出席親子活動，也與兒子同行，對於愛兒深受傳媒和友儕歡迎，「甲抱完到阿乙，乙抱完到丙玩」，他不禁沾沾自喜，更表示全靠太太懷孕時買了兩張木村拓哉的海報貼在家。他靦腆的說：「自己知自己事，我個樣又黑又熊貓眼，BB似我就大劑喇！好在佢似媽咪多啲，仲非常易湊，兩個月戒咗夜奶，真係要感恩。不過，佢有度地方似我，就係大聲，中氣好夠，依家成日大大聲嗌，又鍾意咿咿呀呀講嘢。有次我帶埋佢去朋友屋企團契，八個人輪流分享之後祈禱，BB竟然喺我哋祈禱嗰陣不停講嘢，好似覺得我哋個個講完嘢，仲唔輪到佢講咩？好好笑㗎！」事實上，信之嘟嘴的樣子也似足涂謹申，肚餓時會不期然嘟長，可愛非常。
奶柱射面
「涂信之」的名字由涂謹申太太阿Sue改，意味着有信念、值得信任，並包含信仰之意。阿Sue深信教育兒子，「育」比「教」重要，「等孩子去experience個人生，所以我哋成日帶個仔接近大自然呀，去體驗，去摸索。」涂謹申補充說：「我哋育兒唔一定要好似打比賽咁，一定要佢好叻，琴棋書畫十項皆能，我哋比較自由啲囉。」
涂謹申只求兒子健康、快樂地成長；他與太太雖然均為基督徒，但也讓孩子長大後，自行決定信仰，不逼迫、不強求。說到育兒樂事，他喜孜孜地說：「有次佢食完奶，我埋去哄吓佢，同佢距離兩吋度啦，嗰時佢兩個幾月，突然成條奶柱射落我塊面度，分量有我成塊面咁多，好難忘！」
他繼續發放笑彈：「仲有一次，老婆喺牀尾同佢換片，我喺牀頭“氹”住佢，等佢唔好踢腳郁手咁啦，點知佢何B仔唔係向前，反而瞄準後面嘅我嚟射，至神奇係 BB個頭冇濕喎，啲尿尿係越過佢再射落我嗰度，我即時話：『有冇搞錯呀，真係好離譜，拋物綫咁，大佬！』笑到肚痛！」配合涂謹申的趣致表情，的確哄堂大笑。
涂謹申坦言：「我成日對住個仔，真係好開心架，其他人都覺得我係開心咗，個樣都好咗，尤其立法會啲警衞，睇住我前幾年因為婚姻問題好唔開心，好似想死咁，而家真係唔同晒，我見到個仔就溶晒喇，佢跌倒整親，我好肉痛架，所以老婆會睇住我，以免我縱壞個仔囉。」
「佢好鍾意買玩具畀個仔，而家兩至六歲嘅玩具都有啲喇。」阿Sue邊說邊瞄向身旁的涂謹申，他卻笑騎騎的把玩兒子的小手，愛在心內暖。
本文摘自7月4日東周刊親子天地
|
|
|
|
