|
不平則鳴、有話直說的高志森，來到訪問現場，劈頭便問：「乜嗰啲雜誌都有親子版o架咩？對唔住，我唔應該咁講！『嗰啲』即係『八卦雜誌』。」說話倔強，但談及一對女兒，卻溫婉而有情，嘴角眉宇滿帶笑意，因為，沒有任何事情比女兒品學兼優更值得高興。
高志森的幼女剛於美國印第安納州大學讀畢古典音樂碩士學位，並以獎學金入讀全美排行第九的康乃爾大學，修讀作曲系博士學位；長女則在俄勒岡州入讀醫學院。
九八年因太空人生活與太太離婚的高志森，幾乎失去兩個女兒，慶幸九年後冰釋前嫌，重拾父女親情，「兩個女自細缺乏父愛，都咁生性，真係好難得。」
拉近距離
九五年，與太太、一對女兒移民夏威夷的高志森，三年後因過着港美兩邊飛的太空人生活，導致離婚收場。決裂前，高志森曾撰寫一封信給長女子蕎，交代父母離婚一事，卻遭她撕成碎紙，自此，高志森與女兒無論見面時或者通電話，均只得到官方答案，父女感情不復當年。
高志森憶述：「可能佢哋嗰時仲細，唔明白父母點解要離婚，覺得我掉低佢哋。到○七年，大女中學畢業，我返去夏威夷觀禮，同佢喺草地上，由朝早十一點傾到夜晚七點，解開咗好多心結同問題；○八年，讀音樂系嘅細女喺暑假返港為焦媛嘅舞台劇《陰道獨白》做鋼琴伴奏，逗留咗三個禮拜，了解清楚晒我喺香港嘅工作係點，關係又拉近番。」個多月前，高志森的幼女子詠於美國印第安納州大學古典音樂系碩士畢業，並以獎學金入讀全美排行第九的康乃爾大學，升讀作曲系博士學位，「除咗免食宿、學費之外，仲有資助金，十足中狀元咁呀！」高志森喜上眉梢。
他續說：「至於大女，三年前喺波士頓馬薩諸塞州嘅Amherst College畢業，佢係讀腦神經研究，之後喺醫院做咗兩年有關嘅工作，上年去俄勒岡州讀大學，讀緊醫學院，佢話想做婦科醫生，我見佢而家都讀得好辛苦，同親我用skype傾偈，都見佢喺電腦室度。」高志森形容幼女子詠為天生的藝術家，性格就與女友焦媛相似，既勤力又有明確的目標。子詠與焦媛還先後合作過舞台劇《聊齋新誌》及《陰道獨白》，而焦媛明年的《馬白克夫人》舞台音樂劇，也屬意由子詠擔任作曲部分，「我而家喺亞視主持節目《高志森微博》，有啲得意嘅集數，都會send條link畀兩個女睇吓。」
收放自如
成功拉近父女感情後，高志森以朋友方式跟兩女兒相處，不僅主動邀請女兒的男朋友一同飯敍聊天，也會以電郵方式慰問對方，他分享一次寶貴的經歷：「早幾年，細女讀緊大學，佢讀音樂嘅，成日要作曲，你知啲藝術家好講靈感，作唔到就會情緒低落。嗰陣我知佢成日喊唔開心，就send咗個email畀佢，以黃霑一句名句去勉勵佢，就係：『凡事做盡但放開』，只要盡咗全力，就唔好太過計較得失，佢畀我呢句說話點醒咗，往後兩年嘅大學生活，都開朗咗好多。」高志森又打了個譬如：養兒育女有如放紙鳶，必須收放自如，「到仔女大個嘅時候，就要放遠啲條線，畀佢自己闖吓，但如果完全放手的話，佢就會飛走o架喇。假若你擺個紙鳶喺身邊，唔放上天畀佢飛，咪盞嘥咗佢囉！正如九五年，我畀兩個女學鋼琴，結果大女學咗幾個月就放棄，細女反而學出個人生！」與時並進的高志森，更認為facebook的發明，絕對可以拉近父母與子女間的關係。兩年多前，幼女在facebook上載新相，高志森留言說：「你個樣好似十歲！」女兒卻回應：「知唔知點解你會咁講？因為你miss咗我嘅成長期，其實我而家已經二十一歲。」那刻的高志森，如夢初醒、感觸萬分，告訴自己：「為人父嘅，便要盡餘生嘅努力，做好崗位。」舞台劇《容易受傷的女人》中，張達明錯過兒子的成長期，其實便是高志森的夫子自道，他將遺憾與無奈滲透劇中，令兩個女兒欣賞後都能諒解。
今年父親節，高志森的兩個女兒恰巧有假期， 一同回港跟他慶祝，即使沒有禮物，但他已經心滿意足，「已經計劃好每日帶佢哋去食啲乜嘢喇，佢哋兩個最鍾意食蒸魚、豉油雞、生煎包、獅子頭……」血濃於水，無論分隔多遠，亦然。
本文摘自6月13日 東周刊親子天地
|
|
|
|
