|
做女人難，做一個相夫教子的賢妻良母更難！
不能不說， 李美鳳嫁到台灣豪門做過埠新娘， 有一對龍鳳胎，有一個顧家的好老公，有一個不老的傳說，幸福至極！就連謙卑的她也明言，令她最感快樂的便是有一個美滿家庭。
不過，成功非僥倖， 談及教育一對十三歲子女的過程，李美鳳曾經痛心疾首、曾經傷心自責，只靠一本一本心理書、育兒書陪她走過十三個年頭， 當作吸收知識也好，當作拿點安慰也好，但求子女把她當成朋友，無所不談，「而家社會複雜咗，青少年喺網絡上接收嘅訊息太多， 要學壞亦快好多。」
因材施教
八七年港姐亞軍李美鳳，在九六年下嫁台灣國茶實業太子爺鄭翔中後，便退出幕前，專注家庭。兩年多後，她誕下龍鳳胎─—寶兒及中福，自此付出雙倍的時間、精神在一對仔女身上，連兒女們學校的任何活動，她也參與其中，如影隨形，不敢怠慢。
「我個仔曾經同我講過：『你唔係twins，你唔會明白twins嘅感受』，因為雙胞胎嘅競爭性好大，佢哋會互相比較，啲同學仔亦都鍾意攞佢哋嚟比！無論學業或者運動，我個女都非常出色，難免會令個仔嘅自尊心受影響，所以，我經常會鼓勵佢、稱讚佢，畀多啲正能量佢。」至於長女寶兒，李美鳳形容她似足自己追求完美，不期然為自己帶來太多不必要的壓力；於是，她便會教導女兒盡量放鬆，勿對自己及他人有過高的要求，「父母同子女一定要溝通，傾多啲偈，教多啲佢哋做人嘅道理，好似我個女咁，唔可以同佢硬碰硬，佢實唔會聽你講，尤其而家踏入反叛期，鬧係絕對冇用嘅。」為了教育子女，李美鳳結婚後一直透過不同的書本吸收育兒的知識，即使小朋友的性格各有不同，書本上提供的管教方法未必奏效，也可當作是給為人母親的一點安慰，「對仔女未出世前我已經睇咗本《Men are from Mars, Women are from Venus》（中文譯名：《男女大不同》）；其實做人阿媽真係成日都有挫敗感，由仔女BB嗰陣開始，佢哋如果病，你又會質疑自己係咪唔識得湊佢？佢哋由細到大都係我親力親為咁去照顧，甚至會喺學校度做幫手，我樣樣做到足，有時佢哋駁我嘴，我真係會激到個心喺度流血㗎！所以睇多啲書，都可以幫助啲媽咪紓緩一吓情緒，做番一啲心理調整。」
有血有淚
失落的情緒可從書本中得到紓解，但育兒過程中的血與淚，卻長埋母親的心坎中。幼子中福，原名中虎，小時候經常生病、跌傷，四歲時更因為在家跌倒而腦震盪，需住院一星期，期間一日嘔足七次，周遭景物全都搖晃不定，令李美鳳擔心到腳都軟，「腦震盪可大可小，我當時好內疚，覺得係大人嘅疏忽！佢入咗醫院後，我直情去埋陪佢瞓，每晚講古仔畀佢聽，同佢傾偈。呢啲經歷，佢到而家都仲記得，母子之間嘅感情係咁樣累積返嚟，好在佢冇事。不過，第二年，佢又跌親，又一次腦震盪，嗰次就輕微啲，跟住我就決定同佢改名喇，有人話『虎』字太惡，所以佢多病痛，而家個名薯啲唔緊要，最緊要佢身體健康啲。」
除此之外，好動的長女也曾經令李美鳳感受過煎熬。女兒歲多時，拿着塑膠杯玩滑梯，一失平衡，膠杯便割傷了她的上唇，血流如注；李美鳳趕緊抱著女兒到醫院，醫生說要縫針，即令她陷入萬劫不復之地，「醫生話要喺六個鐘頭內決定縫唔縫針，佢咁細個，點樣可以唔喊畀佢縫針？就算縫咗，又點樣可以控制到佢唔個傷口？嗰六個鐘頭簡直係一個煎熬，最後我決定唔縫，慶幸我做啱咗決定，佢而家大個咗都見唔到有疤痕；細路仔出意外，父母真係會好痛心。」無止境的付出了愛與關懷，李美鳳只希望子女健康快樂地成長，做一個有責任感的人，「而家啲細路仔真係唔易教，社會複雜咗，青少年喺網絡上接收嘅訊息太多，要學壞亦快好多。
如果我對仔女用電腦，我會成日喺佢後面巡邏，假若佢哋同緊其他人傾偈，我係會行過去問清問楚。雖然佢哋會覺得我好煩，但係我要畀佢哋知我係要make sure佢哋安全，唔係要干涉私隱；同埋要令佢哋明白咩嘢做得咩嘢唔做得，呢個時代，已經冇可能困住佢哋喺屋企，咁樣只會增加仇恨。」李美鳳在最後還說了至理明言：「我做阿媽嘅都要不斷學習，學吓唔好太長氣喇，佢哋反叛期，會嫌我煩㗎！」為擁有圓滿家庭而感到快樂的李美鳳，提及養育一對子女絕非易事，要靠很多書本吸收知識及拿點安慰。
本文摘自10月19日東周刊 親子天地
|
|
|
|
